Labarai
Gwamna Yobe ya ba da tallafin kuɗi a mutane 1000 waɗanda ambaliyar ruwa ta shafa
Daga Ibraheem El-Tafseer
Gwamnan jihar Yobe, Alhaji Mai Mala Buni ya ƙaddamar da tallafin kuɗi Naira dubu ɗari (N100,000) kowane ga kimanin mutane 1000 waɗanda ambaliyar ruwa ta shafa a faɗin jihar a ƙarƙashin shirin Gwamnatin Tarayya na ‘COVID-19 Action Recovery and Economic Stimulus’ (NG-CARES).
Wannan shiri na NG-CARES shiri ne wanda ake aiwatar da shi tsakanin gwamnatin tarayya tare da haɗin gwiwar gwamnatocin jihohi.
“Har ila yau, shirin NG-CARES wata hanya ce mai inganci wanda zai ƙara wa ƙoƙarin gwamnatin jihar Yobe wajen aiwatar da shirinta na farfaɗo da yankunan da ayyukan ‘yan ta’adda ya shafa a jihar, musamman fannin ayyukan yi da samar da kuɗaɗen shiga da kuma dogaro da kai.” Inji Gwamnan.
Gwamna Buni ya bayyana cewa gwamnatinsa ta bayar da gudumawar sama da Naira biliyan 1.8 domin samun nasarar aiwatar da tsare-tsare daban-daban na shirin NG-CARES.
KU KUMA KARANTA: Gwamnan Yobe ya rantsar da sabbin sakatarorin dindindin guda tara
Gwamna Buni ya ƙara da cewa, “waɗanda suka ci gajiyar tallafin sun haɗa da manoma, ƙananan ‘yan kasuwa da matsakaita haɗi da samar da ƙananan ayyukan yi sama da 44 ga yankunan karkara sama da 21 da ke ƙarƙashin hukumar FADAMA da ci gaban al’umma da sauran shirye-shirye masu alaƙa da shi.”
Bugu da ƙari kuma, Gwamna Buni ya yaba wa ƙoƙarin gwamnatin tarayya, abokanan arziƙin jihar Yobe, ƙungiyoyin bayar da agaji don kawo wa jihar ci gaba da sauran abubuwan da suka shafi tallafi wa rayuwa da ci gaban jihar.
Wani sabon gini mai hawa 2 ya rushe a Legas
Wani sabon bene mai hawa biyu a Jihar Legas, ya rushe yayin da ake tsaka da mamakon ruwan sama wanda ya haddasa ambaliya a wasu sassan jihar.
Ginin ya rushe ne a lamba 12 da ke yankin Cameroun kusa da Ewenla a Mushin.
Hukumar Bayar da Agajin Gaggawa ta jihar (LASEMA), ta bayyana cewar bayan isar jami’anta wajen da lamarin ya faru, ta gano wani sabon gini mai hawa biyu ya rushe.
An ceto mutum bakwai; mata uku da maza huɗu, tuni aka kai su asibiti domin duba lafiyarsu.
KU KUMA KARANTA: Wani bene mai hawa 4 ya rufta da mutane a Abuja
Ya zuwa yanzu dai hukumar, ta ce babu wanda ya mutu a dalilin rushewar ginin.
Babban sakataren LASEMA, Dokta Olufemi Damilola Oke-Osanyintolu, ya ce ana ci gaba da gudanar aikin ceto don tabbatar da babu wanda ya maƙale a baraguzai.
Wani jami’in EFCC ya hallaka kansa a Abuja
Rahotanni sun bayyana cewar wani jami’in Hukumar Yaƙi da Masu Yi Wa Tattalin Arziƙin Ƙasa Zagon Ƙasa (EFCC), ya hallaka kansa har lahira a Abuja.
An tsinci gawar marigayin ne a gidansa da ke babban birnin tarayya.
Marigayin, wanda ba a bayyana sunansa ba, an ce ya kasance ɗaya daga cikin waɗanda suka yi kwas na 5 a makarantar horas da masu yi wa ƙasa hidima ta hukumar yaƙi da cin hanci da rashawa.
An ruwaito cewar yana da ƙwazo da himma a wajen gudanar da ayyukansa.
Wata majiya ta ce jami’in ya jima yana fama da baƙin ciki da matsalolin rayuwa kafin mutuwarsa.
Kakakin EFCC, Dele Oyewale, ya shaida wa manema labarai cewa hukumar za ta binciki musababbin da ya sanya ya kashe kansa, kuma hukumar za ta taimaka wa iyalansa.
Oyewale, ya ƙara da cewa hukumar za ta binciki wasu abubuwa da suka haɗa da matsalar taɓin hankali da kuma matsalolin iyali waɗanda ka iya sanya ma’aikacin kashe kansa.
KU KUMA KARANTA: Ana zargin wani jami’in kwastam ya kashe kansa a Abuja
Sai dai ya ce hukumar ba za ta fitar da wata sanarwa ko kuma bayyana sunan jami’in ba, har sai an kammala bincike.
NAFDAC ta rufe shaguna 100 A Enugu
Hukumar Kula da Ingancin Abinci da Magunguna ta Ƙasa (NAFDAC), ta rufe shaguna kusan 100 a babbar kasuwar Ogbete ta Jihar Enugu, bisa zargin sayar da wasu abubuwan sha na jabu.
Daraktan NAFDAC, Martins Iluyomade a yankin Kudu maso Gabas, ya ce hukumar ta ɗauki matakin ne bayan wani samame da ta kai a ranar Litinin.
A yayin samamen jami’an hukumar NAFDAC, sun cafke wata babbar mota ɗauke da kayayyakin maye tare da cafke wasu ‘yan kasuwa huɗu da ake zargi da hannu wajen sayar da jabun abubuwan sha.
Iluyomade, wanda masanin haɗa magunguna ne, ya nanata cewa matakin ya zama dole domin kare masu amfani da ire-iren kayayyakin .
Ya ce waɗanda ake zargin a halin yanzu ana kan bincikensu kuma za su fuskanci tuhuma a gaban kotu bayan kammala binciken.
KU KUMA KARANTA: NAFDAC ta haramta amfani da maganin tari na yara na kamfanin J&J
Har wa yau, ya nanata ƙudurin NAFDAC na kawar da kayayyaki marasa inganci, da jabun abubuwan ci da sha, da gurɓatattun kayayyaki a kasuwa.
Ya ƙara da cewa, an gudanar da binciken ne tare da haɗin gwiwar hukumomin tsaro.
A gefe guda kuma, ya bayyana muhimmancin aikin hukumar na tabbatar da lafiyar al’umma.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano
Pingback: Za mu ci gaba da ayyukan da muka faro a shekaru huɗu da suka gabata – Gwamnan Yobe | Neptune Prime Hausa
Pingback: Za mu ci gaba da ayyukan da muka faro a shekaru huɗu da suka gabata – Gwamnan Yobe - LEGEND FM DAURA
Pingback: Gwamnan Yobe ya jagoranci taro don samar da tsaro mai inganci a jihar | Neptune Prime Hausa