Labarai
Sojojin Najeriya sun lalata haramtattun wurare tace mai 36, sun kama mutane 22 a yankin Neja Delta
Hedikwatar tsaro ta ce dakarun ‘Operation Delta Safe’ sun lalata haramtattun wurare tace man fetur 36 tare da kama wasu mutane 22 da ake zargin ɓarayin mai ne a cikin makonni biyu da suka gabata.
Darakta mai kula da ayyukan yaɗa labarai na tsaro, Manjo janar Edward Buba, ya bayyana haka ne a yayin da yake bayar da ƙarin haske kan ayyukan rundunar a wani taron manema labarai na mako biyu a ranar Alhamis a Abuja.
Buba ya ce, sojojin sun kuma lalata ramuka 61, kwale-kwalen katako 32, tankunan ajiya 87, motoci uku, tanda 126 na dafa abinci, injin fita guda uku, jirgin ruwa mai sauri ɗaya, babura biyu, janareta ɗaya da injinan fanfo guda biyu. Ya ce sojojin sun kuma ƙwato litar ɗanyen mai lita 310,700, lita 14,675 na Automotive Gas Oil, lita 49,000 na kananzir Dual Purpose, makami ɗaya da alburusai uku.
KU KUMA KARANTA: Sojojin Najeriya sun lalata haramtattun hanyoyin tace mai 57, sun kama 16
A cewarsa, “Sojoji a ranar 24 ga watan Yuli, sun kama wani kwale-kwalen katako da ke ɗauke da lita 1000 da ake zargin satar ɗanyen mai ne a yankin Wellhead Cluster Opukushi a ƙaramar hukumar Ekeremor ta jihar Bayelsa.”
A yankin Kudu maso Gabas, dakarun Operation UDO KA sun kai samame kan sansanonin da maɓoyar ‘yan asalin yankin Biafra/Eastern Security Network a jihohin Abiya da Anambara.
Ya ce sojojin sun kuma kama wasu da ake zargin ’yan bindiga ne, tare da kuɓutar da mutanen da aka yi garkuwa da su tare da ƙwato makamai da alburusai a ƙaramar hukumar Onitsha ta Arewa da ke Anambara.
“A yayin gudanar da samamen, sojojin sun ƙwato bindiga ƙirar AK47 guda ɗaya ɗauke da bindigogi 35 na musamman mai nauyin 7.62, bindigogin fanfo guda shida, bindigar gida ɗaya, bindigar ɗane ɗaya, bam ɗin hannu guda ɗaya, motoci huɗu, babura tara, adduna 925. da kuma masu kaifi 151.
“Sauran sun haɗa da sikila 1,080, rigar ‘yan sandan Najeriya da takalma, rigar IPOB/ESN, mai magana ƴaya, rigar ruwan sama da takalmi da sarƙa.
Sojojin sun kuma kama wasu ‘yan bindiga uku tare da kuɓutar da mutane tara da aka yi garkuwa da su.
“Gaba ɗaya, sojoji za su ci gaba da ɗorawa wajen tunkarar ƙalubalen tsaro kuma za su ci gaba da yaƙar masu laifin don miƙa wuya.
“Ana sa ran ’yan Najeriya masu kishin ƙasa za su ci gaba da baiwa sojoji goyon baya, kuma za su tsaya tare da sojoji don fatattakar masu aikata wannan munanan ayyuka daga cikinmu. Tare za mu iya fitar da su,” inji shi.
Kotu ta umarci Sadiya Farouq ta yi bayani kan yadda aka kashe biliyan N729 na tallafi
Kotun Tarayyar da ke Legas ta umarci tsohuwar ministar ayyukan jin ƙai a gwamnatin Buhari wato Sadiya Umar-Farouq ta yi bayani kan yadda ta kashe naira biliyan 729 da gwamnatin ƙasar ta bai wa ‘yan Najeriya miliyan 24 a watanni shida na 2021.
Haka kuma kotun ta bayar da umarni ga tsohuwar ministar ta kawo jerin sunayen mutanen da aka biya kuɗin, da kuma jihohin da waɗanda aka biya kuɗin suka fito da kuma adadin da kowace jiha ta samu.
Ƙungiyar nan da ke yaƙi da cin hanci ta SERAP a Najeriya ce ta shigar da tsohuwar ministar ƙara inda ta buƙaci a yi bayani kan yadda aka raba kuɗin a zamanin Buhari.
Kotun ta bayyana cewa ƙungiyar da ta shigar da ƙarar ta buƙaci a ba ta bayanai dangane da kuɗin da aka raba wa ‘yan ƙasar a 2021.
Ƙungiyar ta SERAP ta yi jinjina ga hukuncin da alƙalin kotun Deinde Isaac Dipeolu ya yanke inda ya ce hakan “nasara ce ga gaskiya da riƙon amana wurin kashe kuɗaɗen jama’a.”
Tuni dai SERAP ɗin ta aika wasiƙa ga ofishin shugaban Nijeriya Bola Tinubu da kuma babban lauyan kasar domin su bi umarnin hukuncin da kotun ta yanke.
KU KUMA KARANTA: Shugabannin bankuna na amsa tambayoyi kan badaƙalar Beta Edu da Sadiya — EFCC
“Muna buƙatar ku umarci ma’aikatar jin kai da ta gaggauta tattara tare da fitar da bayanan kashe kudade na naira biliyan 729 (dala miliyan 467) kamar yadda kotu ta bayar da umarni,” in ji mataimakin daraktan ƙungiyar, Kolawole Oluwadare a ranar Asabar.
An ja hankalin ‘yan Najeriya kan shirin ƙungiyoyin asiri na ɗaukar sabbin mambobi
Rundunar ‘yan sandan Najeriya ta ja hankalin ‘yan ƙasar game da shirin ƙungiyoyin asiri na ɗaukar sabbin mambobi a faɗin ƙasar musamman a jami’o’i da manyan makarantu.
Mai magana da yawun rundunar ‘yan sandan Najeriya reshen Jihar Ribas Grace Iringe-Koko ce ta yi wannan jan hankali a cikin wata sanarwa da ta fitar ranar Asabar da maraice a birnin Fatakwal.
Ta bayyana cewa wata babbar ƙungiyar asiri ta Najeriya tana shirin gudanar da gagarumin biki ranar Lahadi a faɗin Najeriya, musamman a jami’o’i don tunawa da mutumin da ya kafa ta.
“Rundunar ‘yan sandan Jihar Ribas ta samu bayanai game da bikin da ƙungiyar Neo-Black Movement (NBM) za ta yi a faɗin ƙasar ranar 7 ga watan Yulin 2024. Ƙungiyar, wadda ake yi wa laƙabi da Aiye ko Black Axe, tana shirin gudanar da bikin ne domin tunawa da wanda ya kafa ta.
KU KUMA KARANTA: Shugaban hukumar leƙen asirin sojin Isra’ila ya yi murabus saboda harin Hamas na 7 ga Oktoba
Bikin, wanda aka sanya wa suna Ranar AIYE ko 7/7 za a gudanar da shi ne a dukkan jihohin da ke faɗin ƙasa, musamman a manyan makarantu,” in ji sanarwar.
An gargaɗi masu ta da hankalin jama’a a Bikin Dodanni na Egungun a Jihar Oyo
Rundunar ‘yan sandan ta ce tana sane da munanan ayyukan ƙungiyar asirin na kisan mutane a manyan makarantu da faɗace-faɗace a tsakanin ƙungiyoyin asiri da tayar da zaune-tsaye da sauran manyan laifuka.
Ta ce yanzu haka ta baza ƙarin jami’an ‘yan sanda zuwa wasu wurare domin daƙile ayyukan ƙungiyoyin asiri, sannan ta yi ƙira ga iyaye su gargaɗi ‘ya’yansu su guji shiga ayyukan ƙungiyoyin asiri.
“Ana bai wa manyan makarantu shawarar ƙara matakan tsaro da kuma sanya idanu sosai domin tabbatar da tsaron dukkan ɗalibai.
Kazalika ana ƙira ga dukkan makarantu su lura da duk wani taro na ɗalibai da bai kwanta musu a rai ba,” a cewar sanarwar.
An sake zaɓen Bola Tinubu a matsayin shugaban ECOWAS
Daga Idris Umar, Zariya
An tsawaita wa’adin Shugaban ƙungiyar ne a taron shugabannin ƙungiyar ECOWAS karo na 65 da aka yi a ranar Lahadi a Abuja, biyo bayan matakin da Shugabannin suka ɗauka na tabbatar da dorewar zaman lafiya da samar da ci gaba.
Hakan na ƙunshe ne a cikin wata sanarwa da mai ba Shugaban ƙasar Najeriya kuma Shugaban ECOWAS shawara na musamman kan harkokin yaɗa labarai Cif Ajuri Ngelale ya sanyawa hannu, kuma aka rabawa manema labarai.
Da farko dai an zaɓi Shugaba Tinubu a matsayin Shugaban Ƙungiyar a Guinea Bissau a ranar 9 ga Yulin 2023.
A jawabinsa na karɓar Shugabancin ya ce, zai mayar da hankali wajen ƙarfafa kimar dimokaradiyya da kuma tabbatar da muradun ƙungiyar da za ta cika shekaru 50 a shekarar 2025.
Shugaban ƙungiyar ECOWAS ya ayyana Shugaban ƙasar Senegal Bassirou Diomaye Faye, da shugaban kasar Togo Faure Essozimna Gnassingbé a matsayin jakadu na musamman da za su maido ƙasashen Burkina Faso, da Mali, da Jamhuriyar Nijar cikin ƙungiyar bayan ficewarsu.
“Zan ci gaba da ɗaukar matakan cigaba, gami da gina tsarin dimokuradiyya da tsarin da muka gada Na gode sosai ”Shugaban ya ce.
A baya dai Shugaba Tinubu ya yi kira ga shugabannin kasashen kungiyar ECOWAS da su ba da himma wajen ganin an kafa rundunar da za ta samar da zaman lafiya da ci gaban tattalin arzikin yankin.
KU KUMA KARANTA: Shugabannin soja na yankin Sahel suna gudanar da taro a Nijer, yayin da ECOWAS ke taro a Najeriya
Shugaban ya jaddada amfanin rundunar da za ta yi aiki tare da fuskantar barazanar tsaro a yankin.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano
Pingback: Sojoji sun kashe ‘yan fashi 10 tare da ceto mutane tara a Zamfara | Neptune Prime Hausa