Majalisar Wakilai za ta binciki dalilin ƙaruwar farashin man fetur a Najeriya

Majalisar Wakilai ta ƙuduri aniyar kafa wani kwamitin wucin gadi da zai binciki al’amuran da suka haifar da ƙarin farashin famfunan man fetur (PMS), daga Naira 537 zuwa Naira 617.

Ƙudurin ya biyo bayan amincewa da ƙudurin da ɗan majalisa Ugochinyere Ikeagwuonu (PDP-Imo) ya gabatar a doron ƙasa ranar Laraba.

Da yake gabatar da ƙudurin tun da farko, Ikeagwuonu ya ce sashe na 88 (1) da (2) na kundin tsarin mulkin ƙasar ya baiwa majalisar dokokin ƙasar damar gudanar da bincike kan ayyukan kowace hukuma da ke aiwatarwa ko gudanar da dokokin da majalisar ta yi.

KU KUMA KARANTA: Tinubu na neman majalisa ta amince da kuɗin rage raɗaɗin cire tallafin man fetur

Ya ce sashe na 32 na dokar masana’antar man fetur, 2021, ya baiwa hukumar kula da harkokin man fetur ta tsakiya da na ƙasa aiki tare da gudanar da aiki da kuma sa ido kan ayyukan fasaha da kasuwanci da kuma ayyukan mai a Najeriya.

“A ranar Talata 18 ga Yuli, 2023 ‘yan kasuwar man sun ƙara farashin famfon mai daga N537 zuwa N617, ba tare da tattaunawa da hukumomin gwamnati da suka dace ba.

“Na damu da cewa duba da ƙalubalen zamantakewa da tattalin arziƙi da ‘yan Najeriya ke fuskanta a halin yanzu, hauhawar farashin man fetur zai haifar da wahala da wahala ga ‘yan Najeriya,” in ji shi.

Majalisar ta yanke shawarar gayyato Janar Manajan Darakta na NNPCPL don bayyana ƙarin farashin man fetur (PMS).

Sai dai ‘yan majalisar sun yi watsi da ƙiran da ɗan majalisar wakilai Zakariya Nyampa (APC-Adamawa) ya yi na a ci gaba da aiwatar da sabon farashin har sai an kammala bincike.

Mataimakin shugaban majalisar, Benjamin Kalu ya umarci kwamitin, lokacin da aka kafa shi ya miƙa rahotonsa ga majalisar nan da makonni huɗu domin ci gaba da aiwatar da dokar.