Shahararren malamin addinin musulunci mazaunin jihar Kaduna, Sheikh Ahmad Gumi ya sanar da rasuwar mahaifiyarsa.
Rahotanni sun nuna cewa mahaifiyarsa ta rasu ne a ranar lahadin da misalin karfe 5:30 na yamma a wani asibiti da ke garin Abuja.
Ana shirye-shiryen binne ta a makabartar Unguwar Sarki da ke Kaduna a ranar Litinin 06/03/2023 bayan sallar Azahar a gidan marigayi Sheikh Abubakar Mahmud Gumi dake Unguwar Sarki GRA, bayan Lugard Hall a Kaduna.
KU KUMA KARANTA: An yi jana’izar babban ɗan Gwamnan Nasarawa da Allah Ya yiwa rasuwa
A wata sanarwa da Shaihin Malamin ya fitar a shafin sa na Facebook da aka tabbatar, Malamin ya ce: “Inna lillahi wa inna ilaihir rajiun. A yau Lahadi da karfe 5:30 na yamma, ina sanar da rasuwar mahaifiyata.
“Don Allah ku nema mata gafara da rahamar Allah. “Kalmar da ta yi min sati biyu da suka wuce: lnsha Allahu, Allah zai haɗa ta da ‘ya’yanta da jikokinta a Aljannah”. (Da yardar Allah ta musamman, Allah zai haɗa ta da ‘ya’yanta da jikokinta a gidan Aljannah)” in ji Malamin.
