Ƙasashen Waje
Ƴan bindiga sun kashe sojojin Nijar huɗu a kusa da iyakar Najeriya
Sojojin Nijar huɗu sun mutu a wani samame da wasu mahara ɗauke da makamai suka kai kusa da kan iyakar Nijeriya, kamar yadda gidan talabijin ɗin ƙasar ya sanar a jiya Juma’a.
“Ƴan bindiga a kan babura kusan 100 ne suka kai hari kan jami’an jandarma,” a wani sansanin soji da ke Bassira, wani ƙauye da ke kan iyaka a yankin Maradi, kamar yadda wani jami’in siyasa na yankin ya shaida wa AFP.
Harin dai ya yi sanadin mutuwar mutum huɗu sannan biyu kuma sun jikkata, daga cikin jami’an rundunar tsaro ta Nijar FDS, kamar yadda kafar yaɗa labaran ƙasar ta faɗa, yayin da wata mata ta samu rauni sakamakon kuskurar ta da harsashi ya yi.
Bayan shafe awa guda ana musayar wuta, dakarun FDS sun fatattaki maharan, waɗanda suka kwashe ƴan’uwansu da suka mutu da waɗanda suka jikkata, amma sun bar baburansu guda uku da na’urorin sadarwarsu da kuma makamai, a cewar rahoton.
KU KUMA KARANTA: Gwamnatin Nijar ta karya farashin buhun shinkafa mai nauyin kilo 50
“Hari ne da ba a cika samun irinsa ba a yankin,” a cewar ɗan siyasar, inda ƴan bindiga suke yawan kashe mutane da sace-sace da tayar da hankalin al’ummar yankin.
“A yanzu waɗannan mutanen ba masu satar shanu ba ne kawai da muke fama da su…, kamar yadda gwamnan yankin Maradi, Issoufou Mamane, ya shaida wa gidan talabijin ɗin bayan ziyarar da ya kai wajen da aka yi harin.
“Ba za mu bari wannan harin na matsorata da dabbanci ya tafi ba tare da ɗaukar mataki ba.”
Yankin dai yana ɗaukar baƙuncin ƴan gudun hijira daga Najeriya fiye da 46,000, waɗanda suka tsere daga rikicin ƴan bindiga da suka addabi kan iyakar a tsawon shekaru, kamar yadda alƙaluman hukuma suka nuna.
Ƴan fashin, waɗanda ke ɓuya a cikin dazuzzuka, sukan kai farmaki a kan iyakar da ke da nisan kilomita 1,600 a tsakanin ƙasashen biyu.
Dakarun ƙasashe suna jagorantar ayyukan haɗin gwiwa don ƙoƙarin daƙile hare-haren, a hannu guda kuma dole ne su tunkari mayaƙan Boko Haram da kuma ƙungiyar IS ta Yammacin Afirka.
Harin ta’addanci ya kashe sama da mutane 20 a Mali
Wani hari da ake kyautata zaton masu ikirarin jihadi ne suka kai ƙauyen Djiguibombo da ke kusa da garin Bandiagara a yankin tsakiyar ƙasar Mali, ya yi sanadiyar mutuwar fararen hula 20, kamar yadda wasu hukumomin yankin biyu suka tabbatar.
Majiyoyin da suka nemi a sakaya sunansu sun tabbatar da mutuwar mutane 20, sannan suka ce yadda lamuran tsaro suka taɓarɓare a yankin, ya hana jami’an tsaro kai ɗauki wajen.
Wani jagoran matasan yankin shi ma da ya nemi a sakaya sunansa, ya ce tun a farkon daren ranar Litinin ɗin data gabata ne maharan suka kai farmakin, inda suka kwashe tsawon sa’oi uku a cikin garin.
KU KUMA KARANTA: Isra’ila ta kashe ‘yan jarida 106 a yakin da take yi a Gaza — Jami’ai
Ya ce sama da mutane 20 ne aka kashe a harin, kuma fiye da rabinsu matasa ne inda aka ranke musu harsuna.
Kasar Mali dai na fama da matsalolin tsaro na ƙungiyar Al-Qaeda da kuma na IS tun a shekarar 2012, inda ya bazu kasashen Burkina Faso da Nijar da ke makwabtaka da ita.
Tun bayan ƙwace mulki da sojoji suka yi a kasar a shekarar 2020, hukumomi ke jin tsoron fitowa fili su sanar da labarin hare-haren ta’addancin da ake kai wa kasar da ke Yammacin Afrika.
A shirye muke mu yaƙi Hizbollah idan har ta kama – Ministan Tsaron Isra’ila
Ministan Tsaron Isra’ila Yoav Gallant ya ce sojojin Isra’ila za su kasance a shirye don daukar duk wani matakin da ya dace kan ƙungiyar Hizbullah ta ƙasar Labanon, ko da yake abin da ake so shi ne cimma matsaya ta shawarwari.
Muna kai wa ƙungiyar Hizbullah hari sosai a kowace rana kuma za mu kai ga cikakken shiri na ɗaukar duk wani mataki da ake buƙata a ƙasar Labanon, ko kuma cimma wani shiri daga matsayi mai ƙarfi.
KU KUMA KARANTA: Gaza ya zama gidan marayu kuma maƙabartar yara mafi girma a duniya – Emine Erdogan
Mun fi son tsari, amma idan aka kai mu maƙura za mu san yadda za mu yi yaƙi,” an ruwaito Gallant a wata sanarwa da ofishinsa ya fitar.
Ƙasashen Waje
Mutum 12 ne suka mutu, 20 suka jikkata a wani hari da aka kai wata kasuwa a Yammacin Sudan
Mutum 12 ne suka mutu, 20 suka jikkata a wani hari da aka kai wata kasuwa a Yammacin Sudan
Aƙalla mutum 12 ne suka mutu yayin da wasu 20 suka jikkata a jiya Laraba a wani hari da aka kai kan wata kasuwar dabbobi da ke El Fasher, babban birnin jihar Darfur ta Arewa a Yammacin Sudan.
A wata sanarwa da kwamitin sulhu na kwamitocin ‘yan gwagwarmaya na El Fasher ya fitar ya ce “harbin bindigogi a kasuwar dabbobi da ke birnin El Fasher ya yi sanadin mutuwar fararen hula 12 da kuma wasu 20 da suka samu raunuka daban-daban.”
Tun da fari a ranar Larabar da safe, kwamitocin ‘yan gwagwarmaya sun ce dakarun Rapid Support Forces (RSF) sun kai mummunan hari El Fasher da manyan bindigogi.
Tun a ranar 10 ga Mayu, aka fara ƙazamin fada tsakanin sojojin Sudan da RSF a El Fasher. Majalisar Dinkin Duniya da ƙungiyoyin agaji na ƙasa da ƙasa ke amfani da birnin a matsayin cibiyar ayyukan jinƙai ga yankin Darfur.
Rikicin Sudan ya ɓarke ne a cikin watan Afrilun 2023 tsakanin Janar Abdel Fattah al-Burhan da kwamandan RSF Mohamed Hamdan Dagalo kan yarjejeniyar shigar da RSF cikin rundunar soja.
KU KUMA KARANTA: Adadin mutanen da suka rasa muhalli a sassan duniya ya zarta miliyan 114 — MƊD
Ya yi sanadin mutuwar mutum sama da 16,000, da raba kusan mutum miliyan 10 da muhallansu, sannan sama da miliyan 25 na buƙatar agajin jinƙai, lamarin da ya zama mafi girma a duniya ta ɓangaren matsalar rashin matsuguni da yunwa, a cewar MƊD.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano