Daga Fatima GIMBA, Abuja
An kara samun tsaiko a gurfanar da ɗan ƙasar China Geng Quarong, wanda ya kashe budurwarsa ta Kano, Ummulkhuksum Sani Buhari, yayin da kotun Kano ta ɗage ci gaba da sauraron ƙarar.
Neptune Prime ta rawaito cewa a ranar 29 ga Satumba 2022 lokacin da aka gabatar da wanda ake tuhuma kotu don gurfanar da shi, ya roƙi a ɗage shari’ar don ba shi damar tuntuɓar lauyansa don ya wakilce shi a shari’ar. Lauyan masu gabatar da ƙara a ƙarƙashin jagorancin babban lauyan Kano, Musa Abdullahi Lawan bai yi watsi da rokon Quarong na a ɗage shari’ar ba, yana mai cewa batun shari’ar da ake zargin kisan kai na da muhimmanci.
Saboda haka, an ɗage zaman zuwa ranar 4 ga Oktoba 2022 don gurfanar da shi. A lokacin da kotun ta koma ranar Talata domin gurfanar da wanda ake tuhuma, yazo tare da lauyansa Barista Muhammad Balarabe Dan’azumi. Kafin gurfanar da babban mai shari’a na Kano, Abdullahi Lawan, lauyan wanda ake ƙara ya buƙaci kotun da ta samar da wani ɗan ƙasar Sin mai fassara harshen Ingilishi domin baiwa wanda ake karya damar fuskantar shari’ar gaba daya.
KU KUMA KARANTA: Dan ƙasar China ya kashe budurwarsa ‘yar Kano
Ya kawo misali da sashe na 36 (6) A, B da E na Kundin Tsarin Mulkin Tarayyar Najeriya da sashe na 237(2) na Dokar Gudanar da Laifuka (ACJL) 2019 na Jihar Kano. Ya ci gaba da cewa buƙatarsa ita ce ta hana wanda yake karewa kwanton bauna, wanda ba ya jin harshen Ingilishi a matsayin harshen kotu.
“Za mu rubuta zuwa ofishin jakadancin kasar Sin a Najeriya don samar da mai fassara a nan take wanda ake kara,” in ji babban mai shigar da kara. Daga nan an dage sauraren karar zuwa ranar 27 ga Oktoba 2022 don gurfanar da shi. Hakazalika ya ba da umarnin a ci gaba da tsare wanda ake kara a gidan gyaran hali.
