Kamfanin Neptune Prime zai horar da ‘yan jaridu kan yaɗa labarai ta kafafen sada zumunta a Yobe
Shahararren kamfanin yaɗa labarai Neptune Network Nigeria Limited (NNNL), masu buga jaridun Neptune Prime English da Neptune Hausa, za su gudanar da wani shiri na shiyyar da horo kan rahoton jama’a da yada labarai ta kafafen sada zumunta a Potiskum, jihar Yobe, a gobe Laraba, wanda ƙungiyar ‘Yobe First Movement’ ta dauki nauyinsa.
Hakan ya fito ne a cikin wata sanarwa mai dauke da sa hannun Mawallafin / Shugaban NNNL, Malam Hassan Gimba.
Ya ce yin aiki tare zai karfafa iyawa, gami da horo kan aikin jarida na ‘yan ƙasa da dabarun amfani da kafafen sada zumunta wajen bayar da shawarwari.
A cewar sanarwar, hakan zai tabbatar da cewa kungiyoyin mambobi sun samu isassun kayan aiki don rubutawa da yaɗa abubuwan da ke faruwa a zahiri, gibin manufofi, da batutuwan da suka shafi mulki.
Horon wanda ya shafi kungiyoyin fararen hula 20 da aka zabo daga kananan hukumomin Potiskum, Fika, Fune, da Nangere na jihar Yobe, za a yi taro ne a Potiskum.
KU KUMA KARANTA:Mawallafin jaridar Neptune Prime ya gina makaranta da asibiti a Yobe (Hotuna)
Za a yi amfani da horon a matsayin samfuri, wanda masu shirya za su yi amfani da shi don ɗaukar ɗaukacin jihar a mataki na gaba.
Daga cikin ma’aikatan akwai Dokta Ahmed Mohammed Bedu, masani kan harkokin sadarwa, tsohon shugaban kungiyar ‘yan jarida ta Najeriya (NUJ) reshen jihar Yobe, kuma a halin yanzu malami a jami’ar Maiduguri; Dokta Saleh Mari Maina, gogaggen dan jarida kuma malami a cibiyar ci gaba mai ɗorewa ta jami’ar Abuja da jami’ar Bayero (BUK) da kuma jami’ar Baba Ahmed da ke Kano.
Sauran sun hada da Malam Abubakar Ahmed, mataimakin darakta a kamfanin dillancin labarai na Najeriya (NAN) mai ritaya da kuma Dakta Furera Bagel, malami a fannin ilimin harsuna a jami’ar jihar Bauchi.
