Gwamnatin Jihar Zamfara ta bayyana sabbin manufofi bayan taron majalisar zartarwa
Daga Idris Umar, Zariya
Majalisar Zartarwa ta Jihar Zamfara, ƙarƙashin jagorancin Mai Girma Gwamna, Dakta Dauda Lawal, ta gudanar da zama na 11 na shekarar 2025, inda aka yanke muhimman shawara domin inganta shugabanci, tsaro, jin daɗin al’umma, da kuma samar da ci gaba a fannin noma a faɗin jihar.
Da yake jawabi ga manema labarai bayan kammala taron, Kwamishinan Yaɗa Labarai da Al’adu, Mai Girma Honorabul Mahmud Muhammad Dantawasa, ya bayyana muhimman matsayai da aka cimma kamar haka:
1. Dawo da Ƙarin Alawus Ga Limamai da Bilalai
Majalisar ta amince da dawo da biyan alawus na wata-wata ga limamai da bilalai guda 5,080 a faɗin jihar. Wadannan alawus da aka dakatar da su a baya, za a dawo da su daga watan Mayu 2025 tare da ƙarin alawus mafi inganci. Wannan mataki na nuna goyon bayan gwamnati ga cibiyoyin addini da shugabanninsu bisa muhimmancin rawar da suke takawa wajen tabbatar da zaman lafiya da haɗin kai.
2. Kayan Aiki na Ma’aikatar Harkokin Mata da Ci gaban Jama’a
Majalisar ta amince da kashe Naira miliyan 696 domin cika kayan aiki na Ma’aikatar Harkokin Mata da Ci gaban Jama’a, ciki har da wasu ofisoshi da ke cikin ginin JB Yahaya Secretariat. Wannan zuba jari zai taimaka wajen inganta gudanarwa da ayyuka, musamman ga mata da sauran masu rauni a cikin al’umma.
3. Ci Gaba Mai Ma’ana a Sauya Fasalin Lafiyar Farko (PHC)
Honorabul Dantawasa ya bayyana cewa an samu ci gaba mai tarin yawa a shirin sauya fasalin cibiyoyin lafiya na matakin farko. A cikin makonni 10, an tantance cibiyoyin lafiya guda 712, inda aka kammala duba 581 cikinsu gaba ɗaya. Wannan aiki na nufin inganta samun damar lafiya da ingancin hidima, musamman a yankunan karkara.
KU KUMA KARANTA: Gwamna Zamfara ya haɗa kai da kamfanonin ƙasar China don haɓaka sufuri da haƙar ma’adanai
4. Ƙarin Takin Zamani Domin Lokacin Noman Damina Na 2025
A shirin fara daminar noman shekarar 2025, gwamnati ta ƙara yawan tirelolin takin zamani da guda 10, daga 50 zuwa 188 gaba ɗaya. Wannan mataki ne domin tallafa wa manoma da kuma inganta wadatar abinci a jihar.
5. Gargadin Tsaro Ga Manoma Kan Noman Gefen Hanya
Sakamakon ƙalubalen tsaro da ke ƙaruwa, an ja kunnen manoma da kada su noma tsire-tsire masu tsawo kamar gero da dawa a cikin mita 500 daga manyan hanyoyi. Wannan na da muhimmanci wajen hana ‘yan bindiga amfani da gonaki a matsayin mafaka don kai hari ga masu wucewa. Gwamnati na roƙon hadin kan al’umma wajen bin wannan umarni na tsaro domin kare rayuka da dukiyoyi.
Honorabul Mahmud Dantawasa ya jaddada kudurin gwamnatin jihar na ci gaba da gudanar da mulki bisa gaskiya, adalci, da kula da walwalar kowa da kowa. Ya kuma yi kira ga kafafen yada labarai, masarautu, da daukacin jama’ar jihar da su ci gaba da goyon bayan shirin “Ceto Zamfara” da kuma taka rawar gani wajen tabbatar da zaman lafiya da ci gaba mai ɗorewa a jihar.
