An kama wani sojan Najeriya Lorliam Emmanuel da laifin sata da kuma sayar da harsasai ga ‘yan ta’addar Boko Haram. A cikin wani faifan bidiyo, Emmanuel, wanda aka ce yana maƙale ne da Bataliya Task Force Battalion 156, mai suna ”Operation Hadin Kai” a Mainok, jihar Borno, an kwance masa makamai, aka bincike shi kuma aka gano yana ɗauke da alburusai.
KALLI BIDIYON ANAN: https://youtube.com/shorts/X67S0GeLrhg?feature=share
Bidiyon ya nuna yadda aka cire harsashin daga wata riga da ya naɗe a kugu. An jiyo abokan aikinsa suna cewa, “Ka ga rayuwarka? Kai, za ka je ka ba Boko Haram wadannan abubuwa domin su zo su far mana a wannan sansani. Kada ku damu. Allah ya Fika.
“Duk waɗannan ba su da kyau, sun yi tsatsa,” in ji wani soja dangane da harsasai da, da alama sun kasance a hannun wanda ake zargin na ɗan lokaci.
Wanda ake zargin dan asalin jihar Binuwai ne, an ce an mika shi ga jami’an leken asirin soji domin gudanar da bincike.
